Virgin Pa Ako

 

     Cupido Store

“Cupido, kapeng barako ka ba?”

“Hmm, bakit?”

“Dahil hindi kumpleto ang umaga ko kung wala ka!”

“Mag-aral ka ng mabuti Miss,” dinig kong tugon ng lalaking walang pantaas na suot pagkatapos ibigay ang binili ng isang dalaga. Bigyan ng halaga ang feelings sa tindahan ni Cupido.  Ngunit paano ko bibigyan ng halaga ang feelings kung hindi ko naman maramdaman sa ibang tao?

Nagkagusto ka na ba? Na-in love ka na ba? O hindi kaya’y, nagmahal ka na ba o may minahal ka na ba? Pamilyar ba sa iyo ang linyang ito? Batid kong narinig mo na ito sa isang pelikula ni Kathryn Bernardo.

Ngunit anong feeling?  Masaya’t nakakakilig ba o sabi nila’y bumibilis daw ang tibok ng iyong puso? Cupido, huwag kang manghusga ngunit virgin pa ako sa romantikong relasyon. Marami na akong nabasang pocketbooks, wattpad stories, at romantic novels. Sa mga babasahing katulad nito ito ay pamilyar na ang mga senaryong mangangako ang isang lalaki ng kanyang tapat at wagas na pag-ibig sa nililigawan o isinisinta ngunit pagkaraan lamang ng ilang buwan ay magtatapos rin sa paalam. Maging sa panonood ng mga dekalibreng pelikula ay tampok din ang ganitong eksena pahahabain lamang ang tunggalian sa pagitan ng protaganista at antagonista upang umalab ang emosyon at panggigil ng mga taga-subaybay na manonood.

Sabi pa nga nila mahirap daw ang makatagpo ng happy ending. Kung gagamit ba si Cupido ng pana at panudla upang ipares ang dalawang indibidwal posibilidad kayang road to happy ever after na ang ending? Mainit na usapin para sa mga kabataan ang salitang “forever”. Karamihan ay sumasang-ayon ngunit ang iba’y kasing pait ng ampalaya kung hingan ng reaksyon at komento.

Nang bumili ako sa tindahan ni Cupido ay malakas na kantyawan ang sumalubong sa’kin . Naglalaro sila ng Truth or Dare, popular ang larong ito at bihira lamang ako sumali. Huminto ang bote sa isang babae, kaagad naman siyang itinanong ng kanyang mga kaibigan matapos piliin ang Truth. NBSB ka ba?

Muli, huwag kang manghusga Cupido dahil isang malakas na, Oo! NBSB nga ako.

Kung iyong tatanungin ang dahilan ay hindi naman ako interesado at nagmamadali sa pakikipagrelasyon. May tamang oras at panahon ika-nga’t sabi ni Lola Nidora. Hindi rin ako pabebe tulad ng ilang mapag-imbentaryo ng mga salita. Hindi rin mahinhin at pino ang kilos ko tulad ni Maria Clara.  Marami akong hinahangaan at kakilala, mga malalapit na kaibigan at kaklase ngunit ang relasyong kaya kong ibigay ay tulad ng pagmamahal na mayroon ako sa aking pamilya. Masasabi kong hindi pa ako handa sa responsibilidad, mahaba pa ang panahon at oras na aking gugugulin. Tulad nga ng haba nang pising aking hinihila upang kumapit sa hamon ng kasalukuyang pandemya.

Sa bawat produkto na itinitinda ni Kupido ay itinakda ang halaga ng iba’t ibang presyo. May bukod tangi at nag-iisang aangat kaya’t bilhin man ng iba, ay alam kong may nakalaan pang higit na magbibigay ng kasiyahan sa iyong puso.

Walang halaga ang presyo sa tindahan ni Cupido kung nahanap mo na ang iyong Psyche, dahil hindi nadidiktahan ang anumang materyal na bagay ang kayang ibigay higit pa sa matatamong labeling at benefits ng relasyon, este ng mga produkto.

Paunawa lamang mahal naming konsyumer, dahil sa nararanasang pandemya ay ikinalulungkot na ipasara ang Cupido Store. 

P.S observe social distancing and wear your face mask. 

Notice from the owner, Cupido.